အလှနေရာ ပြောင်းကြမယ်

-->

အလှနေရာ ပြောင်းကြမယ်

အရှင်ဥာဏိက

အသက်လေးဆယ်အရွယ်ဆုိုတာ လူငယ်တွေအတွက်တော့ လူကြီးပါ။ ဒါပေမယ့် လူကြီးတွေအတွက် တော့ အသက်ငါးဆယ်ဆုိုတာက လူငယ်ပါပဲ။ (ဗစ်တာ ဟူဂုို)

ဟုိုက်၊ သူ့အလုိုအရဆုို ကုိုယ့်အရွယ်က ခုမှ ချာတိတ်မျှသာ ရှိသေးသပ။ သုို့ပေမယ့် တကယ့်ချာတိတ် တွေ ဘယ်လုိုမှ တွေးဆလုို့မရနုိုင်တဲ့ ချွတ်ယွင်းချွတ်ချော်မှုများကတော့ ခန္ဓာကုိုယ်နဲ့အပြည့်ဖြစ်လုို့နေ ပြီ။

အသိတစ်ယောက်က ငယ်စဉ်ကတည်းက အသက်အပိုင်းအခြားလိုက် အမှတ်မထင် ဟိုနားဒီနားမှာ မှတ်တမ်းတင်ရိုက်ကူးလာတဲ့ သူ့ဓာတ်ပုံတွေကို ပီကာစာဖိုင်နဲ့ပေးပို့ပါတယ်။ တစ်ကိုယ်တော်ရိုက်ထား ပုံတွေကများပေမယ့် ပုံတွေထဲမှာ မိတ်ဆွေငါးဦး စုပေါင်းရိုက်ထားတဲ့ ပုံနှစ်ခုကိုထူးထူးခြားခြား အမှတ် ပြုမိလိုက်ပါတယ်။ အဲဒီနှစ်ပုံကတော့ ဆယ်ကျော်သက်အရွယ် နုပျိုစဉ်ကပုံနဲ့ အရွယ်လတ်ပိုင်းဖြစ်တဲ့ လက်ရှိအရွယ်ပုံတစ်ပုံရယ်ပါ။ ပုံတွေကိုကြည့်ပြီး ဘယ်လိုထင်မြင်သလဲလို့ ပွင့်ပွင့်လင်းလင်းလေး မှတ် ချက်ပေးပါဦးလို့ သူကဆိုလိုက်ပါသေးတယ်။

သာမန်မြင်တွေ့ရတဲ့ ပုံတွေကိုကြည့်ပြီး အားမနာတမ်း မှတ်ချက်ပေးရမယ်ဆိုလျင်တော့ ပုိုပုိုသစ်လာတဲ့ နောက်ပိုင်းပုံတွေက အရောင်တွေစုံ၊ ဓာတ်သားတွေ ပိုကောင်းလာပေမယ့် ဓာတ်ပုံရှင်ရဲ့ ရုပ်ကတော့ ပိုပိုဟောင်းနွမ်းလာတယ်လို့ ထင်ရပါတယ်။ တဖြည်းဖြည်းနဲ့ အကောင်းထက် အဆိုးတွေကသာ များ လာတယ်လို့ ထင်မိပါတယ်။ ငယ်ရွယ်နုပျိုစဉ်ကပုံနဲ့ ရင့်ရော်ကာမှ ရိုက်ကူးထားတဲ့ပုံတွေကို နှိုင်းယှဉ်ပြီး ပုံသက်သက်ကိုသာကြည့်လို့ ပြောရမယ်ဆိုလျင် ရင့်ရော်ရွယ်ရဲ့ပုံတွေက အားနည်းမှုများတာချည်းပါပဲ။ ငယ်ရွယ်စဉ်က ပြည့်ဖြိုးမှုတွေ(ဝတာမဟုတ်ပါ) နုပျိုလန်းဆန်းမှုတွေ၊ အပူကင်းစင်တဲ့မျက်နှာတွေက ကြီးကာမှရုိုက်ထားတဲ့ပုံတွေထဲမှာ မတွေ့ရတော့သလုို ခံစားမိတယ်။

သို့ပေမယ့် ဓာတ်ပုံပိုင်ရှင်ဖြစ်တဲ့ သူမှသာ တဖြေးဖြေး ကြီးရင့်လာခဲ့တာ မဟုတ်ဘူးလေ။ သူ့ပုံတွေကို ဝေဖန်ခိုင်းတဲ့ ကိုယ်ကိုယ်တိုင်လည်းပဲ သူ့လိုပဲ ကြီးရင့်လာခဲ့တာပဲ။ ဒါကြောင့် ကြီးရင့်မှုနဲ့အတူပါလာတဲ့ အသိတရား ခလုတ်က ကိုယ့်စိတ်ထဲမှာ ထင်တဲ့အတိုင်း ပြောလိုက်ဖို့ ခွင့်မပြုဘူးလေ။ အကျိုးမများနိုင် မယ့် စိတ်အားငယ်ဖွယ်စကားတွေထက် စိတ်ချမ်းမြေ့ပျော်ရွှင်ဖွယ်ရာစကားကိုသာ ပြောပေးရလျင် ပို ကောင်းမှာပဲဆိုတဲ့တွေးစိတ်က ရှေ့ကနေ နေရာဝင်ယူခဲ့ပါတယ်။ ဒီအတွက် သူ့ပုံတွေကိုကြည့်ပြီး အကောင်းဆုံးဖြစ်နိုင်တဲ့အရာတွေကို ကြည့်ကာ ချီးမွန်းစကားဆိုလိုက်ပါတယ်။

ကြီးရင့်မှုနဲ့အတူပါလာတဲ့ ရင့်ကျက်မှု၊ တည်ငြိမ်မှုစတဲ့ကောင်းတဲ့အချက်တွေက ဓာတ်ပုံထဲမှာ အထင် အရှား မြင်လုိုက်ရတယ်လုို့ ထင်မိပါတယ်။ ဒါကြောင့် ဓာတ်ပုံများနဲ့စပ်ပြီး ချီးမွန်းစကား ပြောလုိုက်ပြီး ဒီထက်ပြည့်စုံတဲ့ မှတ်ချက်ကိုတော့ အချိန်ရလို့ စာရေးချင်စိတ်ပေါက်တဲ့အခါမှာ ပေးပါဦးမယ်လို့လည်း ပြောလိုက်ပါတယ်။ သူ့ကုိုအဲဒီလုိုပြောဖြစ်ခဲ့တာသည်ပင် တစ်နှစ်နီးပါးရှိပြီ။ ဒီတစ်နှစ်နီးပါးအတွင်းမှာပင် သူ့ပုံက ဘယ်လောက်ပြောင်းသွားလေမလဲ မသိ။ တစ်နှစ်အတွင်းမှာပင်လျင် ကုိုယ့်ရုပ်အသွင် တော် တော်ပြောင်းသွားတာကုိုတော့ ကုိုယ့်ကုိုယ်ကုို မှတ်မှတ်ထင်ထင်ကုို သတိပြုမိပါတယ်။ ရုပ်အသွင် ပြောင်းလဲမှုနဲ့အတူ စိတ်အဆင်ပါ ပြောင်းလဲနုိုင်အောင်ကြိုးစားဖုို့ လုိုတယ်ဆုိုတဲ့အသိကုိုလည်း မကြာ ခဏ သတိရမိတတ်ပါတယ်။

ရင့်ရော်ခြင်းတွေ တိုးလာတာနဲ့အတူ ရင့်ကျက်ခြင်းတွေတိုးလာတာ။ ဆံဖြူခြင်းနဲ့အတူ စိတ်ဓာတ်ဖြူ ခြင်း။ ခွန်အားတွေ နည်းလာခြင်းနဲ့အတူ လောဘ ဒေါသ မောဟ အတ္တတွေ မာန်မာနတွေပါနည်းလာ ခြင်းမျိုးတွေကိုပါ အတူယူဆောင်နိုင်မယ်ဆိုလျင် အိုခြင်းအဓိပ္ပါယ်က ဘယ်လောက်တောင်ပြည့်ဝသွား လေမလဲ။ အများစုသော အလုပ်တွေကို ငယ်ရွယ်သူတွေ၊ ခွန်အားရှိသူတွေမှ လုပ်နိုင်မယ်ဆိုပေမယ့် အရွယ်ရင့်မှုနဲ့မှသာ ယူဆောင်လို့ရနိုင်တဲ့ အချို့အရာတွေအတွက် ဘယ်လိုခွန်အားရှိတဲ့ လူငယ်တွေမှ အရမယူနိုင်တဲ့အလှတွေလည်း လောကထဲမှာ အများကြီးပဲလေ။

ဘဝတစ်ခုရလာလျင် ဘဝအတွက်လုိုအပ်တဲ့ သင်ယူလေ့လာစရာတွေက အများသားပါပဲ။ တစ်ချို့လေ့ လာသင်ယူစရာတွေဆုိုတာက တစ်နေ့ထဲနဲ့သင်လုို့ရနုိုင်တာမျိုး မဟုတ်ဘူးလေ။ နှစ်ပေါင်းတာရှည် လေ့ လာမှရနုိုင်တာမျိုး မဟုတ်လား။ အသက်အရွယ်ကြီးရင့်လာသူတစ်ယောက်အဖုို့ ခုလုိုနှစ်ရှည်လများသင် ယူလေ့လာမှရနုိုင်တဲ့အရာများကုို သင်ယူခွင့်ရခဲ့လေပြီရယ်လုို့ ဝမ်းမြောက်ဂုဏ်ယူနုိုင်ပါတယ်။ အတွေ့ အကြုံဆုိုတာ ဝယ်ယူလုို့ မရနုိုင်ဘူးလုို့ ဆုိုတယ်ပဲ မဟုတ်လား။

အုိုရွယ်တာကုို စိတ်မပျက်ပါနဲ့၊ လူတုိုင်းအုိုချင်လုို့ အုိုခွင့်မရနုိုင်ပါဘူးတဲ့။ ဟုတ်တာပေါ့လေ။ ကြားနေမြင် နေရတဲ့ ပတ်ဝန်းကျင်မှာတင်ကုိုပဲ အုိုခွင့်မရရှာပဲ ငယ်ငယ်ရွယ်ရွယ်နဲ့ ဆုံးပါးသွားကြသူတွေ နည်းတာမှ မဟုတ်တာ။ ကုိုယ့်အနီးဆုံး အသုိုင်းအဝန်းအတွင်းမှာကုိုပဲ ကုိုယ့်အောက်ငယ်သူတွေ၊ ကုိုယ်နဲ့ရွယ်တူ တွေ ဆုံးပါးသွားကြတာ သိသိသာသာကုိုပဲ များနေပြီ။‘မျှော်လင့်မှု အိပ်မက်တွေနေရာမှာ စိတ်ပျက်အား ငယ်မှုတွေနဲ့ အစားမထုိုးသေးသမျှ သင် မအုိုသေးပါဘူး’ လုို့ တစ်ယောက်ကတော့ ပြောဖူးတယ်။ ဒီတော့ တစ်ခုခုအတွက် မဆုံးနုိုင်တဲ့စိတ်ကူးအိပ်မက်တွေ ဆက်မက်ကာနေဖုို့လုိုမယ်ပေါ့။

ငယ်ရွယ်စဉ်က လုပ်နုိုင်ခဲ့တဲ့အရာ၊ ရနုိုင်ခဲ့တဲ့အရာတွေကုို ကြီးရင့်လာတဲ့အခါ မရနုိုင်တော့ကောင်းလား လုို့ ငယ်ဘဝနဲ့လက်ရှိကြီးရင့်မှုကုို နှိုင်းယှဉ်ပြီး စိတ်ပျက်အားလျှော့နေဖုို့ လုိုမ်ယ်မထင်ပါဘူး။ စိတ်ပျက် အားလျော့နေခြင်းအတွက်လည်း ဘာကောင်းကျိုးမှ ဖြစ်နုိုင်မယ် မဟုတ်ပါဘူး။ မနိုင်နိုင်မဲ့အရာတွေကို မဖြစ်နိုင်မှန်းသိလျက် ယှဉ်ပြိုင်နေတာထက်စာလျင် ယှင်ပြိုင်နိုင်လို့ရတဲ့အရာတွေထဲက ကိုယ့်အတွက် လည်း အကောင်းဖြစ်စေ၊ သူတစ်ပါးတွေအတွက်လည်း အကောင်းချည်းသာဖြစ်စေမယ့် အရာမျိးမှာ သာ ပြိုင်ဆိုင်ဖို့ သင့်မယ်မဟုတ်လား။

သူ့ပုံတွေကုိုပြပြီး ကုိုယ့်ငယ်ရွယ်စဉ်က ဓာတ်ပုံတွေကုိုလည်း ပြပါဦးလုို့ ဆုိုပါသေးတယ်။ ကုိုယ့်မှာငယ် ရွယ်စဉ်ပုံဆုိုတာ မရှိဘူးလေ။ ဓာတ်ပုံတောင်မှ မှတ်မှတ်ရရ မြို့ကုိုရောက်မှ စာမေးပွဲအတွက် ဝင်ခွင့် လျှောက်လွှာတင်ဖုို့လုိုလာမှ ပထမဆုံး ဓာတ်ပုံရုိုက်ဖူးတာ။ အဲဒီတော့ ကုိုယ်ဓာတ်ပုံစရုိုက်တော့ အသက်က တစ်ဆယ့်ခြောက်နှစ်လောက်ရှိနေပြီ။ အဲဒီနောက်မှာလည်း သူ့လုိုအသက်အရွယ်အရ စီကာစဉ်ကာရုိုက်ဖြစ်တာမျိုး မရှိပါဘူး။ သုံးလေးနှစ်နေကာမှ တစ်ခါတောင်ရုိုက်ချင်မှ ရုိုက်ဖြစ်တာ။ ဒီတော့ သက်တမ်းအရ မှတ်တမ်းပုံက ဘယ်မှာရှိနုိုင်မှာလဲ။

ဓာတ်ပုံမှတ်တမ်းမရှိလုို့ ငယ်စဉ်ပုံနဲ့လက်ရှိအရွယ်ပုံတွေကုို နှိုင်းယှဉ်မကြည့်နုိုင်ပေမယ့် အရွယ်အတန် ရလာမှ မှတ်တမ်းတင်ဖြစ်တဲ့ပုံတွေနဲ့ ခုလက်ရှိအနေအထားပုံတွေသည်ပင်လျင် တော်တော်ကွာခြား သွားပြီ။ ဘယ်လုိုမှဖုံးကွယ်လုို့မရနုိုင်တဲ့ ကြီးရင့်မှုရဲ့ အရိပ်နိမိတ်တွေက ခုနောက်ပုိုင်းရုိုက်ခဲ့တဲ့ပုံတွေမှာ ပုိုမုိုထင်ရှားလာပြီ။ တကယ်လုို့သာ အပြင်မှာတကယ်ရှိနေတဲ့ ခန္ဓာကုိုယ်ရဲ့အတွင်းအပြင် အနေအထား အတုိုင်းသာ ဓာတ်ပုံထဲမှာ ပေါ်ခဲ့မယ်ဆုိုလျင်တော့ ရုိုက်ထားတဲ့ပုံတွေက တစ်နှစ်နဲ့တစ်နှစ် ပုိုမုိုလုို့ပင် ကွာခြားပေလိမ့်မယ်။ တကယ့်ခန္ဓာကုိုယ်ရဲ့ချွတ်ယွင်းမှုက ဓာတ်ပုံထဲမှာတွေ့ရတဲ့ ပြောင်းလဲလာမှုထက် ပုိုမုိုတယ်ဆုိုတာ ကုိုယ်ကုိုယ်တုိုင်ကတော့ ကောင်းကောင်းသိနေလေပြီ။

သုို့ပေမယ့် နုပျိုခြင်းနဲ့အလှတရားဆုိုတာ ရုပ်ချည်းသက်သက်အပေါ်မှာသာ မှီတည်နုိုင်မျိုးမှ မဟုတ်ပဲ လေ။  “မျက်နှာမှာ ပေါ်လွင်ခဲ့တဲ့အလှတရားတွေကုို နှလုံးသားဆီသုို့ ပြောင်းရွှေ့ပေးနုိုင်မယ်ဆုိုလျင် သင် ဟာ ဘယ်သောအခါမှ အုိုမင်းသူတစ်ယောက် ဖြစ်မလာနုိုင်ပါဘူး” တဲ့။  ပျိုရွယ်မှုတွေ၊ မျက်နှာပြင်အလှ တရားတွေကုို နှလုံးသားဆီ နေရာပြောင်းနုိုင်အောင် ကြိုးစားကြရမှာပေါ့။ ဒါဆုို ဘယ်သောအခါမှာမှ မအုိုနုိုင်တဲ့သူတစ်ဦး ဖြစ်ပြီပေါ့။

“သစ်ပင်ရင့်လျင် မီးဆုိုက်လုို့ ပုိုကောင်းတယ်။ နှစ်ချို့ဝုိုင်ဟာလည်း ပုိုသောက်လုို့ကောင်းတယ်။ မိတ် ဆွေဟောင်းလျင်လည်း ပုိုပြီးယုံကြည်ရတယ်။ စာရေးဆရာအုိုရဲ့ စာဟာလည်း ပုိုပြီးဖတ်သင့်တယ်’တဲ့။

ကဲ ဒီလုိုဆုိုတော့ကာ ဒီစာဟာဖြင့် ဖတ်သင့်တဲ့စာတစ်ပုဒ်ဖြစ်မယ်ထင်ပါရဲ့။ ။

ခရီးသွားပါ

ခရီးသွားပါ

ကုိုယ့်အကြောင်းကုိုယ်ပြန်ဖြည့်ရတဲ့ မှတ်တမ်းများမှာ ကုိုယ်အနှစ်သက်ဆုံးနဲ့ ကုိုယ်ဝါသနာပါရာဆုိုတဲ့ အကွက်မှာ စာရေးစာဖတ်လုို့ အမြဲတမ်းဖြည့်နေကျ။ မပြောင်းလဲတဲ့အရာ။ အသက်အရွယ် နေရာ ဒေသနဲ့ အချိန်အခါအရ အခြားဝါသနာတွေ အကြိုက်တွေသာ ပြောင်းကောင်းပြောင်းသွားမယ် စာရေးစာဖတ်တဲ့ဝါသနာကတော့ ခုတုိုင် မပြောင်းမလဲ အမြဲရှိနေသေးတဲ့အရာ။ ဒီဝါသနာဟာဖြင့် နောင်မှာလည်း ပြောင်းလဲသွားနုိုင်မယ် မဟုတ်ဘူးလုို့လည်း ယုံကြည်မိပါတယ်။

စာရေးစာဖတ်ရဲ့နောက်မှာ ကပ်ပါလာတဲ့ဝါသနာ၊ တစ်နည်းပြောရလျင် ဒုတိယအနှစ်သက်ဆုံးအရာက တော့ ခရီး သွားခြင်းပေါ့။ ခရီးများသွားရမယ်ဆုိုလုို့ကတော့ အချိန်မရွေး၊ နေရာမရွေး၊ စိတ်အားထက် သန်စွာ။ အထူး သဖြင့်တော့ သွားရမည့်ခရီးဟာ မရောက်ဖူးသေးတဲ့နေရာသစ်လည်းဖြစ်မယ်၊သွားမည့် နရာက သစ်ပင်တောတောင် ပင်လယ်သမုဒ္ဒရာတွေနဲ့ဆက်စပ်နေပြီး သဘာဝအလှတွေနဲ့လည်း ပြည့် လျှမ်းနေတဲ့နေရာမျိုးဖြစ်မယ်ဆုိုလျင်တော့ ပုိုလုို့ပင်တက်တက်ကြွကြွဖြစ်နေတတ်တယ်။

အတွေ့အကြုံအရပြောရလျင် လူတွေဖန်တီးထားတဲ့ အံ့ဖွယ်ဘနန်းကြီးတွေက နှစ်ကြိမ်သုံးကြိမ်မျှ လောက်ဆုို ရုိုးသွားပြီ။ သူတုို့ဖန်တီးထားမှုအပေါ် ထပ်ဆင့်ကာပုိုမုိုပြီး စိတ်ခံစားမှုအရောင်လည်း ချယ် လုို့မရ။ ရပ်တန့်နေတဲ့အလှတွေ။ သဘာဝအလှတွေကတော့ လူတွေဖန်တီးထားတဲ့အရာတွေလုို ရပ် တန့်နေတဲ့အလှမျိုး မဟုတ်။ တစ်ကြိမ်နဲ့တစ်ကြိမ်၊ တစ်ချိန်နဲ့တစ်ချိန်၊ တစ်ရာသီနဲ့တစ်ရာသီက မတူ။ ကုိုယ့်စိတ်ခံစားမှုအပေါ် မူတည်လုို့ အလှကလည်း အနိမ့်အမြင့်၊ အတုိုးအလျော့၊ အမြဲတမ်း ပြောင်းနေ တတ်တယ်။ ဒါကြောင့် ဆောင်း မှာရောက်ခဲ့ဖူးတဲ့ နေရာဖြစ်ပေမယ့် နွေမှာနောက်တစ်ခေါက်ရောက် ပြန်တော့ အလှရသက တစ်မျိုးတစ်ဖုံ၊ သစ်လွင်လတ်ဆတ်လုို့။ အဲ နွေမှာရောက်ဖူးတဲ့နေရာများ ကလည်း မုိုးနဲ့ဆောင်းမှာ တစ်မျိုးတစ်ဖုံပြောင်း လဲလုို့နေပြန်တယ်လေ။ နွေမုိုးဆောင်းပြောင်းလဲမှုနဲ့အတူ မဟောင်းနုိုင်တဲ့ အလှများနဲ့ အစဉ်ထာဝရ သစ်လွင်စွာ ဝေဆာနေတတ်တာ။

စာရေးစာဖတ်နဲ့ခရီးသွားရတာ ဝါသနာထုံပေမယ့် တခါခါမှာတော့ အကြောင်းအမျိုးမျိုးကြောင့် ကုိုယ် နှစ်သစ်တဲ့၊ ကုိုယ်ဝါသနာပါတဲ့အရာများကနေ အတန်ကြာကြာ ကင်းကွာနေရတတ်တယ်။ ဝါသနာမပါ လှသော်လည်း မလွှဲမရှောင်သာလုို့ မဖြစ်မနေလုပ်နေရတာမျိုးတွေလည်း ရှိတတ်တယ်။ သုို့ပေမယ့် ပါလာတဲ့ဗီဇပုိုးက အဲဒီလုိုဝါသနာပါတဲ့အရာများနဲ့ကင်းနေရတာကုို သဘောကျ မနှစ်သက်နုိုင်ဖူးထင်ပါ ရဲ့။ စာရေးစာဖတ် အတန်ကြာကြာ မလုပ်ဖြစ်လျင်၊ ခရီးတစ်ခုခု မသွားဖြစ်တဲ့အချိန် တော်တော်ရှည် သွားလျင် စိတ်ထဲမှာ တစ်ခုခုလုိုနေသလုိုမျိုး ခံစားမိလာတတ်တယ်။

စာလေးရေး၊ စာလေးဖတ်၊ ကြောင့်ကြမဲ့စွာ သွားချင်တဲ့နေရာလေးသွား၊ ပေါ့ပေါ့ပါးပါးလေးသာ ဘဝ ကုိုဖြတ်သန်း ချင်သူတစ်ဦးအဖုို့ မလွှဲမရှောင်သာ လုပ်ရတဲ့အလုပ်တွေအတွက် အချိန်တွေပေးနေရတာ၊ ကုိုယ့်ဝါသနာကုို နောက်မှာ ပုို့ထားရတာ ဘယ်မှာမွေ့ပျော်ဖွယ် ဖြစ်ကောင်းပါ့မလဲ။

စာမရေးဖြစ်ပေမယ့် ခုရက်ပုိုင်းမှာ စာအုပ်တော်တော်များများကုိုတော့ ဖတ်ဖြစ်လုိုိက်တယ်။ သုို့ပေမယ့် စာအုပ်အနည်းငယ်လောက်ပဲ အဆုံးထိဖတ်ဖြစ်ပါတယ်။ တော်တော်များများစာအုပ်တွေကတော့ မဆုံး ခဲ့ဘူး။ စာအုပ်အလယ်လောက်ရောက်မှ ဆက်မဖတ်ဖြစ်တော့တာမျိုး။ သုံးချိုးတစ်ချိုး၊ လေးချိုးတစ်ချို့ မှာ ရပ်သွားတာမျိုး။ မဆုံးတဲ့စာအုပ်တွေမှာ စာရေးသူတွေက ဘာတွေပြောချင်တာလဲ၊ ဘာတွေပေးချင် တာလဲဆုိုတာ တိတိကျကျ မသိနုိုင်တော့။ စိတ်မအားလုို့ မဆက်ဖြစ်တာ။ ကုိုယ်မအားလုို့ မဆက်နုိုင် တာ။ ထွေကာလီကာ အကြောင်းပေါင်းရယ်က မဆုံးနုိုင်စွာ။ တခါခါမှာတော့ ကိစ္စများမြောင် လူတုို့ ဘောင်ဆုိုတဲ့အစား ကိစ္စများမြောင် ရဟန်းဘောင်လုို့တောင် ပြင်သင့်နေပြီထင်တယ်လုို့တွေးမိပြီး ပြုံးမိ ပါသေးတယ်။

ခရီးသွားခြင်းအကြောင်းကုို စဉ်းစားမိတုိုင်း မြတ်ဗုဒ္ဓရဲ့ “စရထ ဘိက္ခဝေ စာရိကံ ဗဟုဇနဟိတာယ၊ ဒေသေထ ဘိက္ခဝေ ဓမ္မံ” ‘ရဟန်းတုို့ လူများစွာတုို့အား အကျိုးများစေဖုို့ရာ ခရီးထွက်ကြ။ ရဟန်းတို့ ရောက်ရာအရပ်တိုင်းမှာ အပိုအလိုမရှိ အမှားမရှိ တိကျကုံလုံ အလုံးစုံသော သတ္တဝါတို့ကုို ဆင်းရဲကနေ ထုတ်ဆောင်နုိုင်စွမ်းရှိတဲ့ တညီတည်းမှန် တသားတည်း အကျိုးရှိသော ဓမ္မကို ဟောပြော သင်ပြကြ’ ဆုိုတဲ့ မိန့်တော်မူချက်ကုို ဦးစွာသတိရမိတတ်တယ်။ ဗုဒ္ဓကုိုယ်တော်တုိုင်လည်းပဲ သတ္တဝါတစ်ဦးဦး ကောင်းကျိုးဖြစ်ထွန်းမယ်ဆုို တာ မြင်တော်မူလျင် ကုိုယ်တော်တုိုင်ရဲ့ သက်တော်ရွယ်တော်နဲ့ အချိန် အခါကုို ငဲ့တော်မမူပဲ ကြွရောက်ကာ တရားဒေသနာများကုို ဟောပြောလေ့ရှိတာကုိုလည်း မှန်းမျှော် ကြည်ညိုမိတယ်။

အခြားအခြားသောခရီးသွားခြင်းနဲ့ပတ်သက်တဲ့ ရှေးရှေးသူဟောင်းစကားများလည်း ဦးနှောက်ထဲကုိုအစီအရီ ဝင် ရောက်လာပါတယ်။

“The world is a book and those who do not travel read only one page.”  စိန့်သြဂတ် စတင်းကတော့ “ကမ္ဘာကြီးက စာအုပ်တစ်အုပ်လုိုပဲ။ ဟုိုဟုိုဒီဒီ ခရီးမသွားဖူးဆုိုလျင် စာအုပ်ရဲ့စာတစ် မျက်နှာလောက်သာ ဖတ်သလုိုဖြစ်မယ်”ဆုိုတော့ ခရီးမသွားဖြစ်လျင် အဆုံးထိတုိုင် မဖတ်ဖြစ်တဲ့စာအုပ် တွေလုို ကမ္ဘာကြီးက ဘာတွေပြောလုိုတာလဲ၊ ဘာတွေပေးချင်တာလဲဆုိုတာ မသိနုိုင်ဖြစ်လေမလားလုို့ စာတစ်အုပ်နဲ့ကမ္ဘာကြီးကုို ဆက်စပ်ကာတွေးမိပါသေးတယ်။ ဒါကတော့ ခရီးသွားချင်နေတဲ့ကုိုယ့်စိတ် ကုို ပုိုမုိုပြီးသွားဖြစ်အောင် ကုိုယ့်အဆုိုကုိုယ်တင် ကုိုယ့်ဟာကုို ပြန်ထောက်ခံနေတာလည်း ဖြစ်ကောင်း ဖြစ်လေမလားပေါ့။

စူးစမ်းရှာဖွေသူဆုိုတာ အတွေ့အကြုံသစ်တွေ နေရာသစ်တွေ တွေ့ရရုံမျှနဲ့တော့ မလုံလောက်သေးဘူး လေ။ အဲဒီအတွေ့အကြုံသစ် နေရာသစ်တွေကုို ဘယ်လုိုရှုမြင်တယ်၊ ဘယ်လုိုခံစားနားလည်တယ်၊ ဘယ်လုိုတုံ့ပြန်တယ် ဆုိုတာအပေါ်မှာလည်း မူတည်တယ်။ ဒါကြောင့် ခရီးတစ်ခုကုိုသွားတုိုင်း ပကတိ မျက်စိနဲ့ပါမက စိတ်မျက် စိ၊ နှလုံးသား မျက်စိနဲ့ပါ ကြည့်ဖြစ်အောင်ကြည့်လေ့ရှိပါတယ်။

ခရီးစဉ်တုိုင်း ခရီးစဉ်တုိုင်းမှာ မြုပ်ကွယ်နေတဲ့ ပန်းတုိုင်တွေဆုိုတာရှိတယ်လေ။ ဒါဟာ ခရီးသွားသူ ကုိုယ်တုိုင် ကြိုတင်မသိနုိုင်တာလည်း ဖြစ်နုိုင်ပါတယ်။ ဒါဟာ အကောင်းလည်းဖြစ်ကောင်းဖြစ်မယ်။ မကောင်း တာလည်း ဖြစ်ကောင်းဖြစ်မယ်ပေါ့။ ခုလုိုမသိနုိုင်တာကုိုကပင်လျင် ခရီးသွားရခြင်းအတွက် ပုိုမုိုစိတ်ဝင်စားဖွယ် တစ်ခုပါပဲ။

တရုတ်ပညာရှိလောင်ဇူးစကားအရဆုိုလျင်တော့ ‘ခရီးသွားကောင်းတစ်ယောက်ဆုိုတာ ဘယ်ကုိုသွား မယ်ဆုိုတာ ကြိုတင်ပြင်ဆင်သတ်မှတ်ထားတာမျိုးမရှိသလုို ဘယ်အချိန်မှာဘယ်ကုိုရောက်မယ်ဆုိုတာ မျိုးလည်း ရည်ရွယ် ထားမှုမျိုး မရှိရဘူး’တဲ့။ ဘာအကြောင်းကြောင့်မှ ခရီးသွားတာမျိုးမဟုတ်ပဲ တကယ့် ခရီးသွားစစ်စစ်တစ်ဦးဖြစ်ဖုို့ ဆိုလျင်တော့ သူပြောသလုိုဖြစ်ဖုို့လုိုပေလိမ့်မယ်။ တွေ့ရာအိပ်၊ ကြုံရာလည်၊ ရောက်ရာစား၊ ရရာစီး၊ အင်းဒီခရီးမျိုးဆုို လျင်တော့ အတော်ကုိုပေါ့ပါးလွတ်လပ်ပေလိမ့်မပ။

ရှေးသူတော်ကောင်းများကပြောကြတယ်။ သတ္တဝါအားလုံးဟာ သံသရာခရီးသွားတွေချည်းသာတဲ့။ ဆုံးစမထင် တဲ့ခရီးကုို သွားနေကြသူတွေချည်းသာတဲ့။ သွားနေတဲ့သံသရာခရီးစဉ်တစ်လျှောက်မှာ နားခုို ရာ ဘုံဘဝလေးတွေကုို လည်း သူသူကုိုယ်ကုိုယ်ပုိုင်ဆုိုင်နေကြပါတယ်။ ကုိုယ်နားခွင့်ကြုံတဲ့နေရာ၊ လည် ခွင့်ရတဲ့နေရာလေးက ကောင်း တဲ့နေရာဌာန ကောင်းတဲ့အသုိုင်းအဝုိုင်းမှာ မွေးဖွားကြီးပြင်းပြီး မိတ် ကောင်းဆွေကောင်းသူငယ်ချင်းကောင်းများနဲ့ တွေ့ရလျင်ဖြင့် ခဏနားခုိုရာ လည်ပတ်စရာနေရာလေး ဟာ ကြည်နူးစရာဖြစ်လေမှာပ။

တွေ့ရကြုံရတဲ့ ဘုံဘဝအဆောက်အဦက ဒုက္ခစုံပြွမ်းပြီး ကြမ်းထမ်းဖွယ်အတိဖြစ်မယ်ဆုိုလျင်တော့ လည်း လည်ပတ် ခွင့်၊ နားနေခွင့်ရတဲ့နေရာလေးက မောပမ်းငြီးငွေ့ဖွယ် အားငယ်စိတ်ပျက်ဖွယ်သာ ဖြစ်ပေလိမ့်မယ်။

လူ့ဘဝဆုိုတာ ရနုိုင်ရောက်နုိုင်ခဲတဲ့နေရာ၊ အရောင်အသွေးစုံ၊ အလှတွေနဲ့ ပြည့်စုံလွန်းတဲ့နေရာ၊ ရွေး ချယ်စရာ၊နားခုိုစရာ၊ လည်ပတ်စရာတွေလည်း ပေါကြွယ်တဲ့နေရာ။ နားခွင့်လည်ခွင့်ရတဲ့ ဒီနေရာလေး ရဲ့အလှကုို အပြည့်အဝခံစားနုိုင်စေဖုို့ကတော့ ခရီးသွားသူရဲ့ ဘဝအပေါ် ဘယ်လုိုမြင်တယ်၊  စိတ်ခံစားမှု ဘယ်လုိုရှိတယ်၊ ဘဝအပေါ် ဘယ်လုိုတုန့်ပြန်သလဲဆုိုတဲ့အပေါ်မှာသာ တည်ပေလိမ့်မယ်။

တရားခရီးထွက်နေသူတွေအဖုို့လည်း ခန္ဓာကပြနေတဲ့သဘာဝတရားတွေက အဓိကမဟုတ်ဖူးလေ ။ ပြနေတဲ့ သဘာဝတရားတွေကုို ဘယ်လုိုမျက်စိနဲ့ကြည့်မလဲ၊ ဘယ်လုိုခံစားပြီး ဘယ်လုိုတုန့်ပြန်မလဲ ဆုိုတာကသာ ပုိုမုိုအရေးကြီးပေလိမ့်မယ်။

မြင်မြင်သမျှ ဤ လောက၀ယ်

အလှတို့ဖြင့် ခြယ်သဖြင့်လည်း

မြင်ခွင့်ရှိမှ မြင်စွမ်းရသည်။

အလှဟူငြား မြင်သည်ထားဦး

ခံစားသိတတ် ခံယူတတ်မှ

ကျိုးမြတ်ပီတိ ရင်ဝယ်ငြိ၏၊ (မောင်စွမ်းရည်)

ခရီးသွားပါ

စိတ်ငြိမ်းချမ်းမှု ပေးနုိုင်တဲ့ တစ်နေရာ။

ခရီးသွားပါ

လတ်ဆတ်တဲ့လေ ရှူရှိုက်ခွင့်ရနုိုင်တဲ့ တစ်နေရာ။

ခရီးသွားပါ

တိတ်ဆိတ်အေးချမ်းတဲ့ တစ်နေရာ။

ခရီးသွားပါ

စိတ်ကြိုက်စာ ရေးသီနုိုင်တဲ့ တစ်နေရာ။

ခရီးသွားပါ

ချစ်မေတ္တာတရားကုို အဆုံးမဲ့ ဖြန့်ဝေပေးနုိုင်တဲ့ တစ်နေရာ။

မဆုံးသေးတဲ့ခရီးကုို သွားနေရသူတွေအဖုို့ ပန်းတုိုင်မရောက်သမျှတော့ ဆက်ပြီးသာ လျှောက်နေရဦး မယ်။ မောပမ်းလာလျင်လည်း ခဏနားလုိုက်၊ ဆာလောင်လာလျင်လည်း နားကာစားလုိုက်။ ဘ၀ အတွက် အခက်အခဲတွေ၊ သင်္ခန်းစာတွေ၊ ပျော်ရွှင်ကြည်နူးမှုတွေဟာ ခရီးဆုံးပန်းတုိုင်ဆီကနေ ရနုိုင် တာမျိုးမဟုတ်၊ သွားနေဆဲ ခရီးဆီကသာ ရနုိုင်တာမျိုးဆုိုတာ ရှင်းရှင်းလင်းလင်း သိနားလည်ခြင်းနဲ့ အတူပေါ့လေ။ ။

အရှင်ဥာဏိကာဘိဝံသ

ကာလီဖုိုးနီးယားတက္ကသုိုလ်

(မှတ်ချက်)

ရက်တုိုခရီးတစ်ခုထွက်ဖုို့ လေယာဉ်လက်မှတ်ဝယ်အပြီးမှာ ရုတ်တရက်စာရေးချင်စိတ်ပေါ်လာလုို့ ရေး ဖြစ်လုိုက်တဲ့ ဒီစာလေးဟာ ခရီးသွားတစ်ဦးဦးအတွက် အကျိုးတစ်စုံတစ်ရာ ဖြစ်နုိုင်ကောင်းမယ် ထင်ပါ ရဲ့။ ။

Invitation to Mudita Shwe Kyaung Htamene Pwe

Honoring Masoeyein Sayadaw U Yazadhamma

ရွှေဖနောင့်ပုိုင်ရှင်

အရှင်ဥာဏိကာဘိဝံသ (ကာလီဖုိုးနီးယားတက္ကသုိုလ်)

ဒီဇင်ဘာ ၃၊ ၂၀၁၂

အမေရိကမှာသီတင်းသုံးနေကြတဲ့ မစုိုးရိမ်တုိုက်သစ် ဆရာတော်ကြီးရဲ့ တပည့်တွေက  ဆရာတော် ဘုရားကြီးပူဇော်ပွဲအတွက် စာတွေအသီးသီး ရေးပြီးသွားကြပြီ။ သူတုို့တွေက ကုိုယ်နဲ့စာရင် စာရေးတဲ့ အကျင့် သိပ်မရှိကြသူတွေ။ ကုိုယ်ကတော့ ဘာရယ်သာ မဟုတ်တယ်။ ပြည်တွင်းက မဂ္ဂဇင်းအချို့၊ ဂျာနယ်အချို့။ ပြည်ပက အင်တာ နက်အပါအဝင် ဟုိုဟုိုဒီဒီ မြန်မာမီဒီယာတော်တော်များများမှာ ဆောင်းပါးတွေ ကဗျာတွေ မပြတ်မပြတ် ရေးနေတဲ့သူ။ ရေးပြီးသားဆောင်းပါးတွေကုို စုပေါင်းပြီး စာအုပ်ထုတ်ဝေခဲ့တာလည်း လေးငါးအုပ်ခန့် ရှိပြီ။ ရှင်လူအကြားမှာလည်း အတန်အသင့် အသိအမှတ် ပြုခံရတဲ့ ကလောင်ရှင်တစ်ဦးလုို့ ပြောလုို့ရနေပြီ။

ဒီတော့ ဒီလုိုသူတစ်ဦးက ကြုံတောင့်ကြုံခဲ ကုိုယ်အလွန်လေးစား ကြည်ညိုရတဲ့ဆရာရင်းတစ်ပါးရဲ့ သက် တော်ရှယ်ဆယ်ပြည့် အထိမ်းအမှတ်ပူဇော်ပွဲအဖြစ် တပည့်သစ်ဟောင်းတွေက စုပေါင်းပြုလုပ်ကြမည့် ပူဇော်ပွဲအတွက် အမှတ်တရ ထုတ်ဝေမည့်စာအုပ်ထဲမှာ ပါဝင်ကာစာရေးဖုို့ တက်တက် ကြွကြွဖြစ်နေ ရမှာ။ အခြားတပည့်များရဲ့ရှေ့က ဖြစ်နေရမှာ။ ခုတော့ ဒီလုိုမဟုတ်။ စာမူလက်ခံတဲ့ရက် ကုန်ခါနီးအထိ ရေးဖုို့ မစနုိုင်သေးဘူး။

တကယ်တော့ လက်နဲ့ရေးတဲ့အထိ(အဲကွန်ပြူတာနဲ့ရုိုက်တဲ့အထိ)သာ မရောက်တာ။ စိတ်နဲ့တော့ အကြိမ်ကြိမ် ရေးကြည့်နေပြီးသား။ သုို့ပေမယ့် အခြားအကြောင်းအရာတွေ ရေးရာမှာ စာရေးတာမြန် တယ်လုို့ အသိအမှတ်ပြုခံရတဲ့ကုိုယ်က ကိုယ်လေးစားတဲ့ ကုိုယ့်ဆရာသမားအကြောင်း ရေးမယ်ဆုို တော့ လက်က ခပ်တွန့်တွန့်။

မိတ်ဆွေတစ်ပါးကတော့ ‘သူတောင်ရေးပြီးနေပြီ။ ရေးတော့လေ’ လုို့ ကုိုယ့်ကုိုပြောပါတယ်။ သူ့ကုိုတော့ ‘အဲပေါ့လေ။ ဘာနာမည်မှ မရှိတဲ့သူတွေကတော့ ဘာရေးရေး၊ ဘယ်လုိုနေနေ၊ ကောင်းကောင်း မကောင်းကောင်း အကြောင်းမဟုတ်ဖူးပေါ့’ လုို့ ပြန်ပြောလုိုက်တယ်။ ကုိုယ်ကတော့ နာမည်တစ်လုံးနဲ့ နေသူဆုိုတဲ့ သဘောပေါ့။

တကယ်တော့ သူ့ကုိုနောက်ပြီး ပြောခဲ့သလုို အမှန်တကယ်ကုိုယ်က နာမည်တစ်လုံးနဲ့နေလုို့ မရေးဖြစ် နုိုင်သေးတာ မဟုတ်ပါဘူး။ ဂုဏ်ကြီးလွန်းလုို့ နာမည်တစ်လုံးနဲ့ နေတော်မူတဲ့ ကုိုယ့်ဆရာသမား အကြောင်းမုို့ ရေးဖုို့လက်တွန့်နေလုို့ ကြန့်ကြာနေရတာပါ။

ကုိုယ်ဘယ်လောက်ပဲရေးရေး။ ဆရာတော်ရဲ့ ဂုဏ်ပင်လယ်သမုဒ္ဒရာများထဲက ဂုဏ်ရေစက် သေးသေး ငယ်ငယ်လေးမျှလောက်ကုိုပင်လျင် ထင်ရှားအောင် ဖော်နုိုင်စွမ်းရှိမယ် မဟုတ်ဘူးဆုိုတာ ကုိုယ့်ကုိုယ် ကုို သိနေတာကြောင့်ပါ။ ဘာပဲဖြစ်ဖြစ် တပည့်တွေ စုပေါင်းပူဇော်ကြမည့် ထူးကဲတဲ့ဒီလုိုပွဲမျိုးမှာ ကုိုယ့် လက်ရာလေးတစ်ခုမှ မပါလုိုက်ရဘူးဆုိုလျင်ဖြင့် တစ်သက်တာလုံး နောင်တရလုို့ဆုံးမှာ မဟုတ်တော့ ဘူး။ ကုိုယ့်ဆရာရဲ့ အမှတ်တရ သက်တမ်းစာအုပ်မှာ အုတ်တစ်ချပ်အဆင့်မဟုတ်ခဲ့တောင် သဲတစ်ပွင့် မျှလောက်တော့ ပါကုိုပါဝင်ရမယ် မဟုတ်လား။ ဒါကြောင့် မရဲတရဲနဲ့ ကျွဲလှည်းစီးတဲ့သဘောနဲ့ ကုိုယ် ပြောချင်တဲ့ ဆရာတော့်အကြောင်း ဝင်ပြောရပါတယ်။

ဆရာတော့် ဂုဏ်မမြောက်ခဲ့လျင်တောင်မှ ‘ဒီငနွား၊ ဖနောင့်နဲ့ ပေါက်လုိုက်ရ’ ရယ်လုို့ ရေရွတ်တော်မူရုံ သာ ဆရာတော် တတ်နုိုင်ပေလိမ့်မယ်။ ရွှေဖနောင့်တော်ကတော့ ကုိုယ့်ခေါင်းပေါ် ကျရောက်နုိုင်တော့ မယ် မဟုတ်ပေဘူးလေလုို့ ကုိုယ့်ကုိုယ်ကုို အားပေးရင်းပေါ့။ ဟုတ်တယ်လေ။ ကုိုယ်က အဝေးတနေ ရာမှာ ရောက်နေခဲ့လေပြီကုိုး။

တပည့်တွေပြန်ဆုံလုို့ ဆရာတော့်အကြောင်းပြန်ပြောရင် ဆရာတော့်ဖနောင့်အကြောင်းက မပါမပြီး တဲ့အကြောင်းလေ။ ဆရာတော်က စာဆုိုစာအံလုပ်နေတဲ့ တပည့်တွေရှေ့မှာ စာအုပ်တစ်အုပ်ကုိုကုိုင် ရင်း စင်္ကြန်လျှောက်နေလေ့ရှိတယ်။ ထူးခြားတာက တပည့်တစ်ပါးပါး စာဆုိုမှားနေပြီဆုိုလျင် မှားနေ တဲ့တပည့်နားမှာ ဆရာတော်က ရောက်ရောက်နေတတ်တာ။ ပါးလှတဲ့ဆရာတော့်နားက အမှားကုို ချက်ခြင်း သိရုံမျှမက သွားနေတဲ့ခြေထောက်ကလဲ ‘ဒီငနွား၊ ဖနောင့်နဲ့ပေါက်လုိုက်ရ’ လုို့ ပြောရင်း ပြောတဲ့စကား မဆုံးမီမှာပဲ ရွှေဖနောင့်တော်က ခေါင်းပေါ်ကုို ကျလာတော့တာပါပဲ။

ဆရာတော်က လမ်းလျှောက်ရာမှာသာ မြန်တာမဟုတ်ဘူး။ ဖနောင့်ပေါက်ရာမှာလည်း အလွန်မြန် တော်မူပါတယ်။ ခံရတဲ့တပည့်က ကုိုယ့်အလှည့်မှာ မော်မကြည့်ဝံ့ပေမယ့် သူများအလှည့်မှာ ဘေးနား က မော်ကြည့်လျင်ဖြင့် နှုတ်က ဒီငနွားလုို့ အော်ငေါက်နေပေမယ့်လည်း ဆရာတော့်ရဲ့ ပြုံးနေတဲ့ မျက် နှာကုို မြင်ကြရစမြဲပါ။ ဒါကြောင့်လည်း ဆရာတော်ရဲ့ ဖနောင့်ကုိုကြောက်ပေမယ့် ဒီအကြောက်ဟာ ချစ် ကြောက်ရုိုသေခြင်းသာ ဖြစ်တယ်ဆုိုတာ တပည့်အားလုံးက နားလည်ကြခြင်းဖြစ်ပါတယ်။

မော်ကြည့်တယ်ဆုိုပေမယ့် မသိမသာပဲ ကြည့်ကြရတာပါ။ သိသိသာသာကြည့်လုို့ ဆရာတော်မိသွား လျင်ဖြင့် ‘အောင်မာ ဒီငနွားက ကုိုယ့်စာကုိုကြည့်တာ မဟုတ်ဖူး’ ဆုိုပြီး ဒုတိယဖနောင့်က မော်ကြည့် သူခေါင်းပေါ်ကုို ရောက်လာမှာ အသေအချာပဲလေ။

ဆရာတော်နဲ့တပည့်များအကြား ချစ်ကြောက်ရုိုသေဖြစ်စေတဲ့ အပြန်အလှန် နားလည်မှုရှိကြတဲ့ ဆက် ဆံရေးအကြောင်းအရာတွေက အများသားပါ။ ပြောပြလုို့ ကုန်နုိုင်မယ် မဟုတ်သလုို ဆရာတော်အနီး အနား ဝပ်တွားကာ ပညာမဆည်းပူးဖူးသူများအနေနဲ့လည်း အချို့အရာများကုို နားလည်နုိုင်မယ် မဟုတ် ပါဘူး။

ခုဆုိုလျင် ဆရာတော်ဘုရားရဲ့ ရွှေဖနောင့်နဲ့ ထုဆစ်လုိုက်လုို့ ထွက်ပေါ်လာတဲ့တပည့်တွေ မြန်မာပြည် တစ်ဝှမ်းမှာသာမက ကမ္ဘာအရပ်ရပ်မှာပင် ကျရာဝန်ထမ်း၊ နုိုင်ရာတာဝန်ယူနေကြသူတွေ အမြောက် အများရှိနေပြီ။ ဒီတပည့်တွေဟာဖြင့်  “ရွှေဖနောင့်အောက်က  ထွက်လာတဲ့ ရွှေတပည့်များပေါ့ဘုရား” လုို့ ပြောမယ်ဆုိုလျင် “အောင်မာ၊ အောင်မာ၊ ဒီငနွားက ကြွားက ကြွားသေး” လုို့များ ဆရာတော်က မိန့် တော်မူလေ မလား။ မိန့်ခဲ့မယ်ဆုိုလျင်တောင် ဆရာတော်ဘုရားရဲ့ နှုတ်ဖျားကတော့ ပြုံးလုို့သာနေမှာပါ။

ပြောစရာရှိလာလျင် မျက်နှာကြီးငယ် မထောက်ပဲ အချက်ကျကျ ပုိုင်ပုိုင်နုိုင်နုိုင်ပြောတဲ့ ဆရာတော်ရဲ့ စကားများက တစ်ခွန်းဆုို ဆုိုသလောက် မှတ်သားလောက်ပါတယ်။ ဆရာတော်ဘုရားမိန့်ကြားခဲ့တဲ့ တန်ဖုိုးမဖြတ်နုိုင်တဲ့သြဝါဒတွေထဲမှာ မှတ်မှတ်သားသားအဖြစ်ခဲ့ဆုံး သြဝါဒတစ်ခုရှိတယ်။ ဒီသြဝဒါဟာ နေရာဒေသအသီးသီး နယ်ပယ်အသီးသီးမှာ လူကြီးတာဝန်ယူနေကြသူတွေအတွက် သတိစကားဖြစ် သလုို အနာဂတ်မှာ လူကြီးလုပ်ကြမည့် သူ့တပည့်တွေအတွက်လည်း လမ်းညွှန်ချက်ဖြစ်တယ်လုို့ ခံယူ တယ်။ ဒီသြဝါဒဟာ ဘဝအတွက် လမ်းညွှန်ချက်တစ်ခု၊ စံတစ်ခုလုို့လည်း ဆုိုနုိုင်ပါတယ်။

တခါက ဆရာတော်ထံရောက်လာတဲ့ တုိုင်းအဆင့်ရှိပုဂ္ဂိုလ်တစ်ဦးက သူတုို့ပါတီရဲ့ သဘောတရားတွေ ကုို ဆရာတော်ကုို  လျှောက်ထားပါတယ်။ သူုတုို့လမ်းစဉ်ဟာ ဘယ်လုိုကောင်းမွန်ကြောင်း စသဖြင့် လည်း ဂုဏ်ယူဝင့်ကြွားစာ ဆက်လက်လျှောက်ကြားပါတယ်။ ဆရာတော်က ပြုံးနားထောင်နေပြီး

‘အေး မင်းတုို့ ပါတီရဲ့လမ်းစဉ်က ကောင်းပါတယ်။ တကယ့်ကုိုယ်မှ ဘုရားအလောင်းလမ်းစဉ်ပါပဲ။ ဒါပေမယ့် အဲဒီလမ်းစဉ်ကို ဦးဆောင်အကောင်အထည်ဖော်နေတဲ့ ခေါင်းဆောင်ဆုိုတဲ့ကောင်တွေက နွားလောင်း တွေဖြစ်နေတာ ခက်တယ်’ လုို့ မိန့်တော်မူပါတယ်။ ကောင်းလှပါတယ်လုို့ ဆရာတော်ကုို လျှောက်ထား တဲ့ ပါတီကြီးနဲ့ လမ်းစဉ်ကြီးလည်း နောက်ဆုံးမှာ ပြိုလဲပျက်စီးပြီး အသံတောင်မကြား ချင်လောက် အောင် လူအများရဲ့မုန်းတီးရွံရှာမှုကုို ခံသွားရပါတယ်။

“စည်းကမ်းဆုိုတာ ကောင်းရုံနဲ့ မပြီးသေးဘူး။ အဲဒီစည်းကမ်းဟာ အများတကာ လုိုက်နာနုိုင်လောက်တဲ့ စည်းကမ်းဖြစ်ဖုို့လည်း လုိုတယ်”လုို့ မိန့်တော်မူပါတယ်။ တချို့အသင်းအပင်းတွေ၊ အဖွဲ့အစည်းတွေမှာ စည်းကမ်းတွေ တော်တော်ကောင်းကောင်း ထုတ်ထားတတ်ကြပါတယ်။ အချို့စည်းကမ်းများဟာ အကျိုးများရေးအတွက်ထက် ဟန့်တားရေးဖက်ကုို ဦးတည်တဲ့စည်းကမ်းများလုို့လည်း ဆုိုနုိုင်ပါတယ်။ သုို့ပေမယ့် အဲဒီစည်းကမ်းတွေဟာ စာရွက်ပေါ်မှာသာပဲကောင်းတဲ့ စည်းကမ်းမျိုး ဖြစ်နေတတ်ပါတယ်။

စည်းကမ်းကုို ရေးဆွဲသူတွေရော။ ဦးစီးအကောင်အဖော်သူတွေရော။ အဖွဲ့ဝင်အများစုရော လုိုက်နာဖုို့ အခက်အခဲဖြစ်တတ်ပါတယ်။ လုိုက်နာဖုို့ခက်ခဲတဲ့ စည်းကမ်းများကုို ပြဌာန်းထားတဲ့အခါမှာ အများစု မလုိုက်နာနုိုင်တာကြောင့် စည်းကမ်းကုိုအမျိုးမျိုးသော နည်းလမ်းများနဲ့ ချိုးကြရ ဖောက်ကြရပါတယ်။ ဒီအခါမျိုးမှာ စည်းကမ်းချိုးဖောက်ရသူများအနေနှင့် ကုိုယ့်ကုိုယ်ကုို အပြစ်ကျူးလွန်သလုိုမျိုး ခံစားရနုိုင် ပါတယ်။ စည်းကမ်းက မတရားမှန်းသိပေမယ့် ပြဌာန်းထားတာက ရှိနေလေတော့ ချိုးဖောက်ရသူမှာ ကုိုယ်အပြစ်လုပ်တာ မဟုတ်ဖူးလုို့သိနေတာတောင်မှ စိတ်ဓာတ်မလုံခြုံသလုို ဖြစ်ရပါတယ်။ လောကမှာ အတ္တနုဝါဒဘေးဆုိုတဲ့ စိတ်မလုံခြုံခြင်းဘေးဟာ အလွန်မှ စိတ်ကုိုရှုပ်ထွေးနောက်ကျုစေပါတယ်။

နောက်ပြီး ကုိုယ်လုပ်တဲ့အလုပ်ဟာ ကောင်းသောလုပ်ရပ်ဖြစ်ပေမယ့်လည်း ရဲရဲဝံ့ဝံ့လုပ်ဖုို့ အခက်အခဲ ဖြစ်တတ်ပါတယ်။ မရဲမဝံ့လုပ်ရတဲ့အလုပ်ဟာ ဘယ်မှာ အင်အားအပြည့် ပါနုိုင်ပါတော့မလဲ။ အင်အား အပြည့်မပါတဲ့သူတွေဆီကထွက်လာတဲ့ ရလဒ်ဟာ အကောင်းဆုံးအရာဖြစ်နုိုင်မယ် မဟုတ်ပါဘူး။ အထူးသဖြင့်တော့ အများသူငါ လုိုက်နာဖုို့ ခက်ခဲတဲ့ဥပဒေသတွေဟာ လောကတုိုးတက်ရေးမှာ အဟန့်အတားဖြစ်နေတတ်တာသာ များပါတယ်။

အချို့ကျတော့လည်း စည်းကမ်းရေးဆွဲသူတွေကုိုယ်တုိုင်ကုိုက ဒီရေးဆွဲတဲ့စည်းကမ်းဟာ အခြားသူတွေ အတွက်သာ ဖြစ်တယ်။ သူတုို့ကုိုယ်တုိုင် လုိုက်နာဖုို့ မဟုတ်ဖူးလုို့ သဘောထားပုံရပါတယ်။ ဥပဒေ အထက်မှာ ဥပဒေပြဌာန်းသုများက အငြိမ့်သားတက်ထုိုင်နေကြပြီး ထင်တုိုင်းခြယ်လှယ်နေကြခြင်းမျိုး ဖြစ်ပါတယ်။ ဒီထက်ဆုိုးတာကတော့ ဒီလုိုဥပဒေမျိုးကုို သုံးချင်တဲ့နေရာ၊ သုံးလုိုတဲ့နေရာမှာသာ သုံးခြင်း ပဲဖြစ်တယ်။ လူမုန်းမူသုံး၊ လူခင်မူပြင် ဥပဒေမျိုးတွေဟာ ဒီလုိုနေရာများက ထွက်လာတတ်တာများပါ တယ်။

            စည်းကမ်းနဲ့ပတ်သက်ပြီး ချထားတဲ့ဆရာတော်ရဲ့ မူတစ်ခုဟာလည်း မှတ်သားဖွယ်ကောင်းပါတယ်။ ဆရာတော်တုိုက်ရုိုက်ကုိုင်တွယ်တဲ့ တပည့်များထဲက ငယ်-လတ်-ကြီး စာသင်သားတွေ ဝါဆိုဦးရောက် တဲ့အခါ အာမခံ ၂-ပါး ရှာကြရတယ်။ အာမခံ ၂-ပါးမရှိလျှင် တိုက်ထဲမှာ ဝါဆုိုခွင့် မရှိပါဘူး။ ဆရာ တော်ရဲ့ အုပ်ချုပ်မှုက အဆင့်ဆင့် အုပ်ချုပ်မှုမျိုးပါ။ ငယ်-လတ်-ကြီး စာသင်သားများကို စာချတန်းနှင့် စာချဘုန်းကြီးများက အုပ်ချုပ်ပြီး စာချတန်းနှင့် စာချဘုန်းကြီးများကိုတော့ နာယကဆရာတော်များက အုပ်ချုပ်ပါတယ်။ နာယက ဆရာတော်များကုိုတော့ မဟာနာယက ဆရာတော်ကြီးက အုပ်ချုပ်ပါတယ်။

အကယ်၍ ငယ်-လတ်-ကြီး စာသင်သား တပါးပါး အပြစ်ရှိလုို့ နှင်ထုတ်ဖုို့လုိုလျင် စာချတန်းနှင့် စာချ ဘုန်းကြီးများက နှင်ထုတ်ပိုင်ခွင့် ရှိပါတယ်။ စာချတန်းနှင့် စာချဘုန်းကြီးတို့ နှင်ထုတ်ထားတဲ့ ငယ်-လတ်-ကြီး တပါးပါးကို နာယကဆရာတော်များနှင့် မဟာနာယက ဆရာတော်တို့က ပြန်လည် လက်ခံ ပိုင်ခွင့် မရှိပါဘူး။ နည်းတူပါပဲ။ နာယကဆရာတော်များ နှင်ထုတ်ထားတဲ့ ငယ်-လတ်-ကြီး တစ်ပါးပါး ကိုလည်း မဟာနာယက ဆရာတော်က လက်ခံပိုင်ခွင့် မရှိပါဘူး။ သို့ပေမယ့် စာချတန်းများနှင့် စာချဘုန်းကြီးများထဲမှ အာမခံပေးမည့်ပုဂ္ဂိုလ် ရှိလျှင်တော့ ဆက်လက်၍ နေထိုင်ခွင့်ပေးပါတယ်။ မဟာ နာယက ဆရာတော် နှင်ထုတ်ထားတဲ့ တစ်ပါးပါးကုို စာချတန်းနှင့် နာယက ဆရာတော်တို့က အာမခံ ပေးလျှင် ဆက်လက် နေထိုင်ခွင့် ရှိပါတယ်။

ဆုိုလုိုတာက အောက်အဆင့်က နှင်ထုတ်လုိုက်တဲ့သူကို အထက်အဆင့် ဆရာတော်များက ဗီတို အာ ဏာဖြင့် လက်ခံပိုင်ခွင့် မရှိပေမယ့် အထက်အဆင့်က နှင်ထုတ်ထားပြီးသား သူကိုတော့  အောက် အဆင့်က အာမခံရလျှင် ဆက်လက်ပြီး နေထိုင်ခွင့် ရှိတယ်ဆုိုတဲ့သဘောပါ။ အုပ်ချုပ်ရေးမှာ တစ်ဦးဦး က အာဏာရှင်ဆန်မှာမျိုးကုို အကောင်းဆုံးကာကွယ်ပေးထားတဲ့ သဘောပါ။ ကရုဏာနဲ့ပညာ မျှတစွာ စီစဉ်ထားတဲ့ ဥပဒေသလုို့လည်း ဆုိုနုိုင်ပါတယ်။

၂၀၁၁ ခု ဇူလုိုင်လက ကုိုယ့်ရဲ့ မုဒိတာရွှေကျောင်းကုို ကုိုယ်အလွန်လေးစားကြည်ညိုတဲ့ ကုိုယ့်ဆရာ သမားအရင်း ရောက်ခုိုက် ဖွင့်လှစ်နုိုင်ခဲ့တယ်။ ဒီအတွက်လည်း အလွန်ဝမ်းမြောက်မိတယ်။ မြန်မာပြည် ပြန်ခါနီး ၂ ရက်အလုိုမှာပဲ မုိုင်ပေါင်း သုံးထောင်နီးပါးဝေးတဲ့ အမေရိကန် အရှေ့ဖက် အတ္တလန်တိတ် ကမ်းခြေကနေ အနောက်ဖက်ခြမ်း ပစိဖိတ်ကမ်းခြေမှာရှိတဲ့ ကျောင်းသစ်ဖွင့်ပွဲကုို အပင်ပမ်းခံကာ ကြွရောက်ချီးမြှင့် ပေးတဲ့အတွက် တပည့်တွေအပေါ်မှာ သနားကရုဏာကြီးတော်မူတဲ့ ဆရာတော့် စိတ်ထားကုိုလည်း ကြည်ညိုအားကျဖြစ်မိတယ်။ ကုိုယ့်အတွက်တော့ ဘယ်လုိုမှ မမေ့ပျောက်နုိုင်မယ့် မှတ်တုိုင်တစ်ခုပေါ့။

စာများများ မရေးပေမယ့် ဆရာတော်ဘုရားရေးသားခဲ့တဲ့ မစိုးရိမ်ဆရာတော်ဘုရားကြီး ဘဒ္ဒန္တသူရိယာ ဘိဝံသ ထေရုပတ္တိကထာကတော့ တစ်အုပ်ဆုို ဆုိုသလောက် ပညာရှင်အများရဲ့ ချီးကျူးအလေးထား မှုကုို ခံရပါတယ်။ ဒီစာအုပ်ဟာ ဆရာတော်ဘုရားကြီး ထေရုပတ္တိကထာဆုိုပေမယ့် မစုိုးရိမ်သမုိုင်းလုို့ ပြောလုို့ရလောက်အောင် မှတ်သားဖွယ်တွေ၊ အတုယူဖွယ်တွေနဲ့ ပြည့်နေပါတယ်။ ဆရာတော်ရဲ့ရေး သားနည်းက ရှင်းလင်းသလုို ရေးဟန်ကလည်း အကြောင်းအရာအချက်အလက်ပေါ်မှာ တုိုက်ရုိုက် ဆန်တဲ့နည်းကုိုသုံးကာ တင်ပြထားပါတယ်။

ဆရာတော်ရဲ့ ဒီစာတစ်အုပ်ကပဲ စာရေးလုိုတဲ့ ကုိုယ့်အတွက် တွန်းအားကောင်းကောင်း ဖြစ်စေခဲ့တယ်။ သုို့ပေမယ့် တွေးရတာပျော်တဲ့သူမုို့လားတော့ မသိဘူးပေါ့။ တုိုက်ရုိုက်ရှင်းရှင်း ရေးသားထားတဲ့ ဆရာ တော်ရဲ့စာကုိုဖတ်ခဲ့တာတောင် နားနားပြီး စဉ်းစားကာ အတွေးများနဲ့ ဖတ်ခဲ့ပါတယ်။

လွန်ခဲ့တဲ့ ၂၀၀၁ ခု ပထမအခေါက် ဆရာတော်ဘုရား အမေရိကကုိုကြွတော့ အတွေးအမြင်မှာ ကုိုယ် ရေးခဲ့တဲ့ဆောင်းပါးများကုို ဆရာတော်ဖတ်ဖုို့ ကပ်ပါတယ်။ ဆရာတော်က သူ့တပည့်ရေးထားတဲ့ ဆောင်းပါးတွေကုိုဖတ်ပြီး “မင်းစာတွေက အတွေးအခေါ်တွေ သိပ်များလွန်းတယ်ကွ”လုို့ မိန့်ပါတယ်။ ဒုတိယအကြိမ်အဖြစ် ၂၀၁၁ ခုမှာ ဆရာတော်အမေရိကကုို ရောက်တဲ့အခါမှလည်း ကိုယ်ရေးဖြစ်ခဲ့တဲ့ ဆောင်းပါးများကုို ဆရာတော်က စိတ်ပါဝင်စားစွာ ဖတ်ပါတယ်။

(၁၂) နှစ်ကျော်ကြာကြာ အမေရိကမှာ နေထုိုင်ပြီး မြန်မာပြည်ကုိုပြန်ရောက်တော့ ဆရာတော်အထံ အဖူးမြော်ရောက်တဲ့အခါမှာ “မင်းစာတွေက အတွေးအခေါ်တွေ များလွန်းတယ်ကွ” လုို့ ဆရာတော်က မိန့်ပြန်ပါတယ်။ ဆောင်းပါးတုိုင်းမှာ အတွေးအခေါ်တစ်ခုခုကုိုသာမက ရသတစ်ခုခုကုိုပါ ပေးနုိုင်အောင် ထည့်ကာရေးလေ့ရှိတဲ့ ကုိုယ့်စာတွေအစား ပုိုပြီးသိလွယ်အောင် တုိုက်ရုိုက်ကြကြ ရုိုးရုိုးရှင်းရှင်း ရေး သားဖုို့ မိန့်လုိုတာဖြစ်မယ်လုို့ ယူဆမိပါတယ်။

ကုိုယ့်လုို သာမန်တပည့်တစ်ပါး ရေးတဲ့စာကုို အခွင်သင့်တုိုင်း အထူးဂရုပြု ဖတ်တာကြောင့် ကျေနပ် ဂုဏ်ယူမိပါတယ်။ ကုိုယ်ကြည်ညိုလေးစားတဲ့ ကုိုယ့်ဆရာက ကုိုယ့်စာကုိုဖတ်တာသိရတဲ့ တပည့် တစ်ပါးရဲ့ ကြည်နူးကျေနပ်မှုမျိုးက များပြားလှတဲ့ ဆရာတော်ရဲ့တပည့်တွေအကြား တပည့်အနည်း ငယ်လောက်သာ ရရှိနုိုင်မယ့် အခွင့်အလမ်းမျိုး ဖြစ်မယ်ထင်ပါတယ်။ ဒီတစ်ခုတည်းနဲ့ကုိုပဲ ဆရာတော် ရဲ့ သက်တော်ရှစ်ဆယ်ပြည့်စာအုပ်မှာ စာတစ်ပုဒ်နဲ့ပူဇော်ဖုို့ သင့်လှပြီ မဟုတ်လား။

ဆရာတော်ဘုရားကတော့ သူ့ရဲ့တပည့်ရေးတဲ့စာကုို အတွေးအခေါ်တွေများကြောင်း မှတ်ချက်ပြုပါ တယ်။ ကုိုယ်ကတော့ ခုလုိုတွေးခေါ်မြော်မြင်တတ်အောင် သင်ကြားပေးခဲ့တဲ့အတွက် ဆရာတော် ဘုရားကုို အလွန်မှပဲ ကျေးဇူးတင်မိပါတယ်။

ဆရာ့ဂုဏ်ဂုဏ်ရည်ကုို မျှော်မှန်းဦးညွတ်လုို့ သင်ကြားပုို့ချ ဟောကြား ရေးသားရင်း ကျန်ရှိသက်တမ်း အတွင်း မမောပမ်းနုိုင်စွာသာလျင်ပဲ သာသနာခရီးကုို ဆက်လုို့နေပါဦးမယ်။ ဒါသည်ပင်လျင် ဆရာ တော်ကျေးဇူးကုို အကောင်းဆုံးပေးဆပ်ခြင်း ဖြစ်ပေလိမ့်မယ်လုို့လည်း ယုံကြည်မိပါတယ်။ ။

ဆရာတော်ဘုရား ဖနောင့်အစုံကုို ကြည်ယုံဦးခုိုက်လျက်

တပည့် ဥာဏိက

အရှင်ဥာဏိကာဘိဝံသ

မုဒိတာရွှေကျောင်း

27695 Leidig Ct., Hayward, CA 94544, USA

ashinlay@gmail.com                       

မုဒိတာရွှေကျောင်း စာကြည့်တိုက် ဖွင့်ပွဲ ဆန်ဖရန်ဘေးဧရိယာ၊ ဟေးဝဒ်မြို့နယ်မှာ ကျင်းပ

မုဒိတာရွှေကျောင်း စာကြည့်တိုက် ဖွင့်ပွဲ ဆန်ဖရန်ဘေးဧရိယာ၊ ဟေးဝဒ်မြို့နယ်မှာ ကျင်းပ

မိုးမခဓာတ်ပုံသတင်း၊ (Photos by SFBC Facebook)၊ နိုဝင်ဘာ ၂၆၊ ၂၀၁၂

            အရှင်ဥာဏိကာဘိဝံသ ကျောင်းထိုင်သီတင်းသုံးသော မုဒိတာရွှေကျောင်းတွင် မြန်မာမိသားစုများအတွက် မြန်မာစာကြည့်တိုက်ဖွင့်လှစ်ပွဲကို ယမန်နေ့ညနေက ဟေးဝဒ်မြို့ ကျောင်းတည်နေရာတွင် ဖွင့်လှစ်ခဲ့သည်။

            ဆရာတော်ကိုယ်တိုင် စုဆောင်းထားသော မြန်မာစာအုပ်များ၊ ဘာသာရေးစာအုပ်များနှင့် အများသူငှာတို့ ၀ိုင်းဝန်းလှူဒါန်းသော စာအုပ်များ စာနယ်ဇင်းများ စုစုပေါင်း ၁၃၀၀ နီးပါးဖြင့် အဆိုပါ မြန်မာစာကြည့်တိုက်ကို ဘုန်းကြီးကျောင်းထူထောင်ပြီး ၁ နှစ် အကြာတွင် ဖွင့်လှစ်နိုင်ခဲ့ခြင်းဖြစ်သည်။ ဆရာတော်က ရပ်နီး ရပ်ဝေးက မြန်မာစာဖတ်သူများအတွက် ရည်ညွှန်းစရာ၊ အားကိုးစရာ ဖြစ်စေမည့် စာကြည်တိုက်၊ စာဖတ်ခန်းတခု ဖြစ်လာအောင်၊ မြန်မာစာဖတ်သူ အများအတွက် ရည်ရွယ်ပြီး ကြိုးစားသွားမည်ဟု ပြောကြားသည်။

            ဘေးဧရိယာသို့ စာပေဟောပြောပွဲအစီအစဉ်ဖြင့် ရောက်ရှိနေသော စာရေးဆရာ မိတ်ဆွေများဖြစ်သည့် ကံထွန်းသစ်၊ မောင်စွမ်းရည်နှင့် နေဘုန်းလတ်တို့ ရောက်ရှိနေခုိုက် အဆိုပါ စာကြည့်တိုက်ကို အမှတ်တရ ဖွင့်လှစ်ခဲ့ခြင်းဖြစ်သည်။ 

မုဒိတာရွှေကျောင်း မြန်မာစာကြည့်တိုက်ဖွင့်ပွဲသို့ မြန်မာစာဖတ်သူ မြန်မာမိသားစု ၄၀ ကျော် တက်ရောက်ကြသည်။ စာအုပ်စာတမ်းနှင့် စာကြည့်တိုက်အတွက် လှူဒါန်းကူညီမှုများ ပြုလုပ်ကြသည်ကို တွေ့ရသည်။ ဧည့်သည်တော် စာရေးဆရာများက စာကြည့်တိုက်ဖွင့်ပွဲတွင် အမှတ်တရစကားများ ပြောကြားကြပြီး စာကြည့်တိုက်များသည် လူမှုအဖွဲ့အစည်းအတွက် အရေးပါပုံ၊ စာကြည့်တိုက်များ တည့်တံ့ထိန်းသိမ်းရေး အားပေးဆောင်ရွက်ကြရန်၊ မြန်မာစာဖတ်သူများ ထွန်းကားရေး နှိုးဆော်ကြရန် တိုက်တွန်းသွားသည်။

            မုဒိတာရွှေကျောင်းစာကြည့်တိုက်၏ စာအုပ်ကတ်တလောက်သွင်းခြင်း၊ အသင်းဝင်များ ပြုလုပ်ခြင်း၊ စာအုပ်ငှားယမ်းခြင်းတို့ကို အင်တာနက်အခြေပြု စာကြည့်တုိုက်စနစ်ဖြင့် စီစဉ်ဆောင်ရွက်ခဲ့ခြင်း ဖြစ်သည်။ Openbiblo Open Source အခြေခံစာကြည်တိုက်စနစ်၊ ဘားကုတ်မှတ်စက်၊ ပုံနှိပ်ပရင်တာတို့ကို San Francisco Burmese Community Organizers & Volunteers တို့က ၀ိုင်းဝန်း စီစဉ်ပြီး လုပ်အားပေး စေတနာ့ဝန်ထမ်းတို့ဖြင့် ပြင်ဆင်ပေးခဲ့သည်ဟု ဆိုသည်။ ဆရာတော်၏ မုဒိတာရွှေကျောင်းစာကြည့်တိုက်တွင် စာအုပ်ငှားယမ်းလိုသူများက စာကြည့်တိုက်အသင်းဝင်ကြရန် လိုအပ်ပြီး ၀င်ကြေးမှာ အခမဲ့ဖြစ်သည်။ စာကြည့်တိုက် အသုံးပြုခြင်း၊ လည်ပတ်မှုနှင့် စည်းကမ်းစည်းမျဉ်းများကို စာအုပ်ငှားယမ်းသူများပေါ်မူတည်ပြီး သတ်မှတ် ထုတ်ပြန်သွားမည်ဟု ဆိုသည်။

            စာကြည့်တုိုက်ဖွင့်ပွဲသို့ Shwe Video အဖွဲ့က မှတ်တမ်းရုပ်သံ လာရောက် ရိုက်ကူးပေးခဲ့သည်။

            (Photo Credit – San Francisco Burmese Community Organizers – Facebook http://facebook.com/BurmeseSF )