Thursday, September 12, 2013

မာတာဘိခ်ျကမ်း ထူးဆန်းထွေလာ


မာတာဘိခ်ျကမ်း ထူးဆန်းထွေလာ
ဥာဏ်ဦးမောင်
 
ဒီတစ်ခေါက်သွားဖြစ်တဲ့ခရီးက အမေရိကန်နုိုင်ငံရဲ့ အရှေ့တောင်ဖျားပြည်နယ်တွေဆီ။ တိတိကျကျ ပြောရ
ရင်  မြောက်နဲ့တောင်ကာရုိုလုိုင်းနားပြည်နယ်များ၊ ဂျော်ဂျီယာပြည်နယ်နဲ့ ဖလော်ရီဒါပြည်နယ် တွေပါ။ ဒီအထဲမှာ ဂျော်ဂျီယာပြည်နယ်ကတော့ ဖြတ်သွားဖြတ်လာ ခဏတာ နားရုံမျှမုို့ အထူးတလည် ပြောစရာ မရှိပါဘူး။ မြောက်တောင်ကာရုိုလုိုင်းနားပြည်နယ်များနဲ့ ဖလော်ရီဒါပြည်နယ်ထဲက ထင်ရှား တဲ့နေရာ  တော်တော်များများကုိုတော့ ရောက်ခဲ့တယ်။ နေရာအားလုံးဟာ သူ့ပုံဟန်နဲ့သူ သဘောကျ စရာချည်းပါပဲ။ အချို့က အံ့သြစရာ၊ အချို့က ပျော်ရွှင်ကြည်နူးစရာ၊ အချို့နေရာများကတော့ လွမ်းမော တသစရာ။ သုတ ရသ ဒဿနအလှတွေ တစ်လှေကြီးရခဲ့တဲ့ခရီး။

 






ဖလော်ရီဒါပြည်နယ်အတွင်း ရောက်ခဲ့တဲ့နေရာတွေထဲမှာ အလျင်က ရောက်ဖူးတဲ့နေရာလည်းပါသလုို ကြားဖူးရုံ မျှ နေရာလည်းပါရဲ့။ အလျင်က လုံးဝမကြားမိခဲ့ဖူးတဲ့နေရာအချို့လည်း ပါဝင်ပါတယ်။ မြောက် တောင်ကာရုိုလုိုင်း နား ပြည်နယ်များထဲကုိုတော့ ဒါကပထမဆုံးအကြိမ်ရောက်ဖူးခြင်းလေ။ ဒီပြည်နယ် များထဲကနေရာအတော် များများကလည်း နာမည်မျှတောင် မကြားခဲ့ဖူးလောက်အောင် စိမ်းနေခဲ့တာ။ မကြားဖူးတဲ့နေရာများမှာ မထင်မှတ် ထားတဲ့အရာများကုိုတွေ့ရတော့ မယုံကြည်ဖွယ်တွေဖြစ်ပြီး မအံ့ သြပဲ မနေနုိုင်ဖြစ်ရတာ ဘယ်မှာအဆန်းတော့လည်း ဟုတ်ပါ့မလဲ။

အံ့သြခြင်းတွေကြားမှာ လွမ်းမောတသစရာနေရာများလည်းပါဝင်နေခဲ့တာဟာ ခရီးသွားရခြင်းရဲ့ အလှရသ များဖြစ် လေမလားရယ်လုို့လည်း တွေးမိခဲ့ပါသေးရဲ့။ သွားခဲ့တဲ့နေရာတွေထဲ စိတ်မှာအမှတ်ထင် ထင် ဖြစ်ခဲ့တဲ့နေ ရာကတော့ တောင်ကာရုိုလုိုင်းနားပြည်နယ်ထဲက အတ္တလန်တိတ် ကမ်းခြေမြို့လေးတစ်မြို့ ပေါ့။ နာမည်က Myrtle Beach တဲ့။ နားထဲမှာတော့ မာတာဘိခ်ျလုို့ပဲကြားမိပါတယ်။ အမေကမ်းခြေ လုို့ပဲ ကုိုယ့်ဘာသာကုိုဘာသာပြန်ကာ စိတ်ထဲမှာမှတ်ထားလုိုက်ပါတယ်။

ဒီအမေကမ်းခြေမြို့လေးကုိုတော့ အလျင်က နာမည်မျှပင် မကြားဖူးခဲ့။ ရောက်ရမယ်လုို့လည်း ထင် မထားခဲ့။ အမည်မျှပင် မကြားမိဖူးတဲ့ဒီမြို့လေးဟာ အမှတ်ထင်ထင်ဖြစ်စရာများနဲ့စုစည်းတည်ဆောက် ထားတဲ့မြို့လေး တစ်မြို့ဖြစ်လိမ့်မယ်လို့လည်း ဘယ်မှာကြိုတင်မျှော်လင့်ထားခဲ့ပါ့မလဲ။ ဒီကမ်းခြေလေး ဟာ မုိုင်ယာမီတုို့လုို ဟာဝုိုင်ယီတုို့လုို ကျော်ကြားတဲ့ကမ်းခြေတစ်ခုတော့ မဟုတ်ပါဘူး။ သုို့ပေမယ့် လည်း ကမ်းခြေရဲ့အလျားက မုိုင် ၆၀ ကျော်ကျော်ရှည်တာဆုိုတော့ ကမ်းခြေငယ်လေးတစ်ခုတော့ လည်း မဟုတ်ပါဘူး။ ကမ်းခြေတလျှောက် တမြော်တခေါ်မြင်ရတဲ့ မုိုးထိမြင့်မား တည်းခုိုခန်းများ၊ လူနေတုိုက်ခန်းတွဲများက ဒီကမ်းခြေလေးကုိုလာရောက် အပန်းဖြေသူတွေ မနည်းလှဘူးဆုိုတာကုို ညွှန်ပြနေသလုိုပါပဲ။

အမေကမ်းခြေမြို့လေးရဲ့ အသိသာအထင်ရှားဆုံး အမှတ်အသားကတော့ ဂေါက်ကွင်းတွေဖြစ်လေ      မလားပါ။ မီနီဂေါက်ကွင်းခေါ် ဂေါက်ကွင်းအသေးစားလေးများက လမ်းဘေးဝဲယာ နေရာအနှံ့။ ဒါ ကြောင့်လည်း ကမ္ဘာ့ဂေါက် ကွင်းအသေးစားလေးများရဲ့ မြို့တော် (the mini golf capital of the world) လုို့ ဂုဏ်ယူကြတာဖြစ်ပေ မယ်။ ဂေါက်ရုိုက်ဝါသနာပါသူတွေအတွက် နှစ်သက်ဖွယ်အကောင်း ဆုံး ကမ်းခြေမြို့လေးဖြစ်လေမပေါ့။ ကုိုယ်အဖုို့ တော့ ဂေါက် (gout) ရောဂါနဲ့ ဂေါက်နေသူအချို့က ဒုက္ခပေးတတ်လွန်းလုို့ ဂေါက်ဆုိုတဲ့အသံတောင် မကြားချင်လောက်အောင်ဖြစ်နေလေရဲ့။ ဒါပေမယ့် စိမ်းလန်းခြင်းနဲ့ ကျယ်ပြန့်ခြင်းတွေကုိုနှစ်သက်သူမုို့ မြက်ခင်း ကျယ်များနဲ့တည်ဆောက်ထားတဲ့ ဂေါက် ကွင်းစိမ်းစိမ်းများကုိုတော့ နှစ်သက်သဘောကျတတ်ပါတယ်။

ဒီကမ်းခြေမြို့လေးကုိုလာရောက်ကြသူတွေဟာ တစ်နှစ်တစ်နှစ်မှာ ပျန်းမျှ လေးသန်းဝန်းကျင်လောက်ရှိ တယ်တဲ့။ နွေးထွေးတဲ့ရာသီဥတုက ခရီးသွားတွေကုို ပျော်ရွှင်ကြေနပ်မှုဖြစ်စေတယ်တဲ့။ ဆောင်းခုိုလုိုတဲ့ အမေရိကန်အရှေံမြောက်ပြည်နယ်သားတွေနဲ့ ကနေဒါဖက်ကသူတွေ ဆောင်းမှာဒီမြို့လေးကုို လာ ရောက်လေ့ကြလေ့ရှိတယ်တဲ့။ မိသားစုလုိုက် ရက်ရှည်အနားယူလုိုသူတွေအတွက် မိသားစုနေထုိုင်မှု ပုံစံဖွဲ့စည်းထားတဲ့ ဟော်တည်ခန်းများက ခရီးသွားတွေကုို ချောချောမွေ့မွေ့ပုိုမုိုဖြစ်စေတယ်လုို့လည်း သိရပါတယ်။ ငွေကြေးအတော်အတန်ပြည့်စုံတဲ့ မြောက်ပုိုင်းသားတွေအတွက် ဆောင်းခုိုနားနေရာ ဒုတိယအိမ်အဖြစ် မိသားစုပုံစံဟော်တည်ခန်းတွေကုို ဝယ်ယူထားတတ်ကြတယ်။

မာတာဘိခ်ျကုို ရောက်သွားချိန်က မုန်တုိုင်းစဲစအချိန်မုို့ အတ္တလန်တိတ်ရဲ့ ရေပြင်လှိုင်းက အတန်ငယ် မာန်ဟုန်ထနေ ချိန်။ သောင်ပြင်ကမ်းဆီ တဝုန်းဝုန်းချီလာလေတဲ့ လှိုင်းလုံးတွေကြား အရဲတင်းစွာ လှိုင်း စီးနေသူရဲ့သတ္တိကလည်း ချီးကြူးစရာပါပဲ။ သာမန်အချိန်များမှာ လဲ့လဲ့ပြာအောင်ကြည်နေတဲ့ရေပြင်က လည်း အနည်းငယ်နောက်ကျုနေ ချိန်ပေါ့။ သုို့ပေမယ့် လှိုင်းပျော် ရေပျော် ပင်လယ်ပျော်အချို့ကတော့ လှိုင်းလေကြားမှာ မြူးတူးပျော်ပါး စွာ ရေကစား လုို့နေကြဆဲ။ မုိုးရေစုိုစုိုချိုးထားတဲ့ ကမ်းနားသဲသောင်များ က သိပ်သိပ်သည်းသည်း။ မြောက်ကာရုိုလုိုင်းနားပြည် နယ်ရဲ့ အမှတ်တံဆိပ် ထန်းပင်ပျိုများကလည်း ကမ်းခြေတခုို စုိုစုိုပြေပြေ လန်းလန်းဆန်းဆန်း။ ပျားပန်းခတ်မျှ သွားလာလှုပ်ရှားနေတဲ့ အရောင်အသွေး စုံ လူမျိုးပေါင်းစုံတုို့ရဲ့ အပျော်မျက်နှာအောက်မှာ မာတာဘိခ်ျလေး က မြူးရွှင်စွာ လှုပ်ရှားတက်ကြွလုို့။ ဒီအချိန်အခါဟာဖြင့် မာတာဘိခ်ျလေးဟာ အလှတရားအားလုံးတုို့ရဲ့ ဘုရင်မ တစ်ပါးဖြစ်လေမလားပါ။

ကောင်းကင်မှာတော့ မုိုးသားတိမ်လိပ်တွေ အလိပ်လိပ်တွေကြား နေမင်းကြီးက ပေါ်ချည်တခါ ငုတ်ချည် တလှည့်။  နေသာချိန် တိမ်ပြာကြား ထီးထီးမားမားမြင်ရတဲ့ ကမ်းခြေရဲ့သင်္ကေတ (SkyWeel) ကောင်း ကင်ဘီးကြီး က နေကွယ်ခုိုက် တိမ်ညိုမဲတွေအောက်မှာတော့ မတူကွဲပြားတဲ့မြင်ကွင်းကုို ဖြစ်စေပြန် တယ်။ SkyWeel က အချက် အခြာကျတဲ့နေရာမှာရှိတာမုို့ ကောင်းကင်ဘီးကြီး စီးပျော်နေသူတွေအဖုို့ စားသောက်ဆုိုင်တွေ၊ ဟုိုတယ်တွေ၊ အမှတ်တရပစ္စည်းအရောင်းဆုိုင်တွေကြား ပျားပန်းခတ်မျှ လှုပ်ရှား သွားလေနေသူတွေကုို အပေါ်စီးက ဆီးမြင်ရ တဲ့မြင်ကွင်းက တစ်မျိုးတစ်ဖုံထူးခြားနေစေမှာပါ။ ၁ဂ၇ ပေမြင့်တာမုို့လည်း အဆုံးအစမဲ့ အတ္တလန်တိတ်ရေပြင် ကျယ်ကြီးနဲ့ အမေကမ်းခြေမြို့လေးကုိုလည်း ဟုိုး ဝေးဝေးအထိ မုိုးကာဆီးလုို့မြင်ပေမပေါ့။

တစ်နှစ်မှာ ပျမ်းမျှနေသာချိန်က ရက်ပေါင်း ၂၁၀ ဝန်းကျင် အပူချိန်က ၇၄ ဖာရင်ဟုိုက်ဒီဂရီဆုို တော့ နေရောင် ချစ်သူတွေ၊ နွေးထွေးမှုကုိုနှစ်သက်သူတွေအတွက် မာတာဘိခ်ျက စွဲမက်ဖွယ်ဖြစ်စေမှာတော့ အမှန်ပါပဲ။

အမေကမ်းခြေမြို့လေးရဲ့ အထင်ရှားဆုံးသင်္ကေတကတော့ Wonderworks ခေါ်တဲ့ အိမ်ဇောက်ထုိုး အဆောက် အဦပေါ့။ ကမ္ဘာ့အခြားဘယ်နေရာမှာ ဒီအဆောက်အဦးမျိုးရှိလေဦးမယ်ဆုိုတာ မသိပေမယ့် ကုိုယ့်ဘဝမှာတော့ ဒါဟာပထမဆုံးတွေ့ရတဲ့ အဆောက်အဦတစ်ခုပေါ့။ အဆောက်အဦထဲဝင်လုိုက် တာနဲ့ မြင်မြင်သမျှ အရာအား လုံက ဇောက်ထုိုးချည်းဖြစ်တာမုို့ ပတ်ဝန်းကျင်နဲ့လုိုက်လျောညီထွေဖြစ်ဖုို့ ဆုိုလျင်ဖြင့် ဝင်ရောက်သူကုိုယ်တုိုင် က ဇောက်ထုိုးဖြစ်အောင် အလျင်လုပ်ဖုို့လုိုပါတယ်တဲ့။ 
 
အင်း တခါခါမတော့ လောကကြီးက ဇောက်ထုိုးကြည့်မှ အတည့်မြင်ရတတ်လုို့ ဒီလုိုဇောက်ထုိုး ကြည့်ရတဲ့နေ ရာမျိုးရှိတာလည်း ခပ်ကောင်း ကောင်းရယ်လုို့ တွေးမိပါသေးတယ်။

ဘာပဲဖြစ်ဖြစ်ပါ။ အများနဲ့အတူ မတူခြားနားတဲ့ အပျော်ကုိုခံစားလုိုတယ်ဆုိုလျင်ဖြင့် (Inversion Tunnel) က သင့်အတွက် အသင့်ပေါ့။  ကုိုယ်ကတော့ အချိန်မရလုို့ ဒီအတွေ့အကြုံကုို မခံစား နုိုင်ခဲ့။ ဒါကြောင့် ဒါကပင် နောက်တစ်ခေါက် မာတာဘိခ်ျကုို မရောက်ရောက်အောင် သွားဖြစ်စေဖုို့ တွန်းအားတစ်ခုဖြစ်နေခဲ့တယ်။ “နောက်တစ် ခေါက်တော့ အရောက်လာမယ် Wonderworks” ရယ်ပေါ့။



No comments:

Post a Comment